Immikkoortoq taanna 1. juuli 2014-mi saqqummersinneqarnikuuvoq.
Meeqqat inuusuttullu
Meeqqat inuusuttullu ineriartornerannut, atugaannut nammineersinnaanerannullu atugassarititaasut pilersinnissaannut kommunalbestyrelsi akisussaasuuvoq. Meeqqanut inuusuttunullu suliniutini suniluunniit meeqqat pisariaqartitaat aallaavigineqassapput, meeqqat isumassorneqarnerat qitiutillugu. Kommunalbestyrelsip suliassaraa meeqqat inuusuttullu atugaannik nakkutilliissalluni.
Titartagaq 3. 1. januar 2014-mi Kalaallit Nunaanni nukappiaqqat niviarsiaqqallu ukiuinut immikkoortillugit.
Najoqqutaq: Naatsorsueqqissaartarfik
Meeqqanik inuusuttunillu angerlarsimaffiup avataanut inissiisarneq
Meeqqanik sumiginnaaneq allatulluunniit isumaginninnikkut ilungersunartorsiortitsineq pissutigalugu meeqqat peqqissusiat ineriartorneralluunniit ilungersunartumik ersarissumik navianartorsiortinneqarpat kommunalbestyrelsi aalajangiisinnaavoq meeqqap angerlarsimaffiup avataanut inissinneqarnissaanik. Tamanna aamma atuuppoq annersaanermi allatulluunniit atornerluinerni, atornerluinermik ajornartorsiornermi pinerluttuliornerni isumaginninnikkulluunniit ilungersunartorsiortitsinerni.
Annertuumik innarluutillit
Inuit tarnikkut timikkulluunniit annertuumik innarluutillit sapinngisamik naammaginartumik atugassaqartinniarneqassapput. Inuit annertuumik innarluutillit siusinaartumik pensionisianik pisartagaqartinneqalersinnaapput, siusinaartumik pensionisianut pisartagaqarnermut malittarisassat malippatigit. 1. januar 2011-miit timikkut innarluutilinnik tamakkiisumik isumaginninneq Namminersorlutik Oqartussaniit kommuneqarfinnut isumagineqarnera nuunneqarpoq.
Ulloq unnuarlu paaqqinniffiit
Namminersorlutik Oqartussat ulluni makkunani ulloq unnuarlu meeqqanut inuusuttunullu paaqqinniffinnik qulingiluanik ingerlatsipput aammalu ulloq unnuarlu annertuumik innarluutilinnut arfineq marlunnik paaqqinniffinnik ingerlatsillutik. Paaqqinniffiit taakku kommuneqarfinnit aningaasarlersorneqarput. Namminersorlutik Oqartussat paaqqinniffinnik ingerlataasa saniatigut arfinillit namminersorluni paaqqinniffiupput kommuneqarfiillu pingasunik paaqqinniffinnik ingerlataqarlutik.
Utoqqaat
Utoqqalinersiallit angerlarsimaffimminni imminut isumagisinnaanngitsut, kommunip utoqqaat illuinut nuunniarlutik qinnuteqarsinnaapput. Aammattaaq utoqqalinersiallit kommunip utoqqarnut illuutaanut nuukkallarniarlutik qinnuteqarsinnaapput.
Utoqqaat illui utoqqarnullu sammisaqartitsiviit kommuninit pilersinneqarlutillu ingerlanneqartarput.
Titartagaq 3.2. 20013-mi nunani assigiinngitsuni agguaqatigiissillugu utoqqalisarneq
Najoqqutaq: Naatsorsueqqissaartarfik
Nappaat peruluut imaluunniit toqusoqarneq
Qanimut ilaqutaasuni nappaammik peruluttoqartillugu imaluunniit toqusoqartillugu, inunnik isumaginninnermi malittarisassani aalajangersagaqarpoq angalanermut illerfimmillu assartuinissamut ikiorneqarnissamik.
Pisortanit ikiorsiissutit
Kinaluunniit Kalaallit Nunaanni najugaqartoq pisariaqartitsinermini pisortanit ikiorserneqarnissaminut periarfissaqarpoq, ikiorsiineq pisinnaavoq ikiorserneqartup ilaquttamilu inuuniarnerminni nammineerluni tamakkiisumik pilersorsinnaanngippat.
Aamma pilersuinissamut, aningaasartuutinut aalajangersimasunut aningaasartuutinullu ataasiakkaanut pisortanit ikiorneqarnissamik, tamatumunnnga piumasaasut eqquutitissinnaagaanni.
Qimarnguiit
Qimarnguiit najugaqarfiugallarfiupput annersartissimasunut, annersartinnissamulluunniit siorasaartissimasunut imaluunniit taakkununnga assingusunut ilaqutaariinni inooqatigiinnermiluunniit ajornartorsiutilinnut arnanut aamma angutinut meerai ilaatillugit. Najugaqarnerup nalaani siunnersuineq ingerlanneqartarpoq, isumagineqartarlutik allatulluunniit ikiorneqarlutik.
Nuummi, Qaqortumi, Narsami, Paamiuni, Sisimiuni, Aasianni Ilulissanilu qimarngueqarpoq.
Ilaqutariinnut qimarnguiit
Ilaqutariinnut qimarnguiit suliamik angusassamik toraagaqarlutik meeqqanik ilaqutariinnillu eqqugaasunut isumaginninnikkut suliniuteqarput. Suliat atituut makkuusinnaallutik ilaqutariinnik sullissinerit, siunnersuinerit, nalaatsinerluttunik ikiorsiinerit, ilitsersuinikkut siunnersuinerit il.il.. Ilaqutariinnut qimarnguiit kommuneqarfinnit aningaasalersorneqarlutillu ingerlanneqarput. Namminersorlutik oqartussanit tapiinissamut aaqqissuussinermik pilersitaqarpoq, tamanna ilaqutarinnut qimarnguiisa isumannaatsumik ingerlanissaannut aaqqeeqataalluni. Ullumikkut Upernavimmi, Ilulissani, Aasianni, Sisimiuni, Maniitsumi, Tasiilami, Nuummi, Paamiuni, Qaqortumi, Nanortalimmi Narsamilu ilaqutariinnut qimargueqarpoq.
Erninerup nalaani sulinngiffeqarallartarneq ullormusiallu
Anaanaasoq erninissaq sioqqullugu sapaatit akunneri marluk erninerullu kingorna sapaatit akunneri 15-it sulinngiffeqarsinnaavoq; marlunnik amerlanernilluunniit ataatsikkut ernisoqarpat, anaanaasoq sapaatit akunnerinik 19-nik sulinngiffeqarsinnaatitaavoq. Ataataasoq erninermut atatillugu sap. akunnerinik pingasuni sulinngiffeqarsinnaatitaavoq. Sap. akunnerit 15-it pingasullu saniatigut anaanaasup ataataasullu sap. ak. 17-nit namminneq piumasartik naapertorlugu avissinnaavaat. Marlulinermi amerlanernilluunniit ataatsikkut erninermi angajoqqaat katillugit sap. ak. 21-nik sulinngiffeqarsinnaatitaapput.
Meeravissiartaartut angajoqqaarsianngortullu meeravissiartaap meerarsiartaallu tiguneranut atatillugu sulinngiffeqarallartinneqarsinnaapput.
Meeqqanut tapiissutit aamma meeqqanut akilersuutit il.il.
Ilaqutariinnut meeralinnut immikkut tapersersuutitut qaammatit tamaasa meeqqanut tapiissutit meeqqanut 18-it inorlugit ukiulinnut tunniunneqartarput. Meeqqanut tapiissutit tunniunneqartarput ilaqutariit isertitaat 1. januar 2012-miit 280.000 koruunit qaangersimanngippatigit.
Siusinaartumik pensionisiat
Inuit 18-it sinnerlugit ukiullit utoqqaassutikkut ukiut 65-it utoqqalinermi pensiosiaqalernissamut angusimagaanni siusinaartumik pensionisiaqartinneqarsinnaapput, pilersugaqartut 18-nik ukioqalernerminniit utoqqalinersiutinik aamma pisalersinnaapput. Inuit Nunat avannarliit Isumaqatigiissutaanut isumaginninnermut isumannaallisaanermut tunngasumut ilaasut siusinaartumik pensioninik pisalersinnaapput.
Utoqqalinersiat
Utoqqalinersiat 65-nik sinnerlugillu ukiulinnut tunniunneqartarput. Inuit Nunat avannarliit isumaqatigiissutaanut isumaginninnermut isumannaallisaanermut tunngasumut ilaasut utoqqalinersiutinik pisalersinnaapput.
Qitornarsiartaarneq
Qitornarsiartaarnermi malittarisassat ikiorneqarnerlu nittartakkani ukunani atuarneqarsinnaapput: www.naalakkersuisut.gl aamma www.sullisivik.gl
Nittartagaq takuneqarsinnaasoq
Immikkortumut matumunnga tunngasoq ”Pitsaaliuineq ikiorsiinissamullu suliniarneq” nittartakkami www.sullissivik.gl imaluunniit www.naalakkersuisut.gl alakkaruk.